Ryan Giggs yn enwi carfan o 31 ar gyfer gêm ragbrofol cyntaf EWRO 2020
Heddiw (Mawrth 12) fe gyhoeddodd Ryan Giggs garfan o 31 chwaraewr ar gyfer dwy gêm gyntaf Cymru yn 2019 – y gêm gyfeillgar yn erbyn Trinidad & Tobago yn y Cae Ras a’r gêm ragbrofol cyntaf o EWRO 2020 yn erbyn Slofacia.
Gêmau Cymru
Cymru v Trinidad & Tobago
- Dydd Mercher 20 o Fawrth, 19:45
- Cae Ras, Wrecsam
Cymru v Slofacia
- Dydd Sul 24 o Fawrth, 14:00
- Stadiwm Dinas Caerdydd, Caerdydd
Mae Will Vaulks wedi cael ei alw i’r garfan am y tro cyntaf ar ôl creu argraff ar y rheolwr fel capten Rotherham United.
Mae Neil Taylor yn dychwelyd i’r garfan yn ogystal â Ryan Hedges a Lee Evans, dau oedd wedi bod yn rhan o’r garfan yn y paratoadau cyn gêm Mecsico’r llynedd. Mae Ben Davies hefyd yn ôl yn y garfan ar ol colli allan ym mis Tachwedd trwy waharddiad.
Bydd Cymru yn paratoi ar gyfer eu gêm ragbrofol Ewropeaidd cyntaf mewn gêm gyfeillgar yn erbyn Trinidad & Tobago, ble bydd eu rheolwr Dennis Lawrence yn dychwelyd i’r Cae Ras ar Fawrth yr 20fed.
Y gêm yn erbyn Slofacia ar Fawrth 24ain fydd gêm Ewropeaidd cyntaf Cymru ers cyrraedd rownd gynderfynol yr Ewros yn 2016 a bydd Ryan Giggs heb os yn gobeithio efelychu llwyddiant yr ymgyrch hanesyddol honno yn Ffrainc.
Gellir prynu tocynnau ar gyfer Cymru v Slofacia yma: www.faw.cymru/tickets